خواطر طبية «®» أخلاقيات المهنة [7] // بقلم د . علوي القاضي.
«®» خواطر طبية «®»
(أخلاقيات المهنة) [7]
من مذكراتي : د / علوي القاضي.
... حينما قرأت قصص جحا ، الملأى بالسخرية والنقد لمعظم سلوكيات البشر الغير منطقية ، في قصة (جحا وإبنه والحمار) ، وجدت كيف أن حاله لم يعجب الناس ، وانتهى به الأمر لأنه حمل الحمار وسار به إلى بيته ، لفت نظري سلوك الناس تجاه جحا ، وهذا جعلني أشبه الطبيب بجحا ، من ردود فعل الناس تجاهه مايسمى بـ (معادلة الطبيب المستحيلة) ، حقيقي ربنا يكون في عون الطبيب ، وبالذات الذي يراعي ربنا في المريض ويريد مساعدته ، فالطبيب يعيش واقع عملي من ألسنة الناس ، وماحدث لي مثال حي :
... فأنا من قرية و (تحدثاً بنعم الله) من أصل طيب ، واتربيت على أخلاق الدين الوسطي ، والأدب والإحساس بالناس ، والحمد والشكر لله ، ثم لأبي وأمي ومشايخي
... أول ما فتحت عيادتي وكنت (ممارس عام) منذ 43 سنة ، وكان الكشف عندي وقتها بـ (4) جنيه ، بناء على توجيهات من والدي ووالدتي مراعاة لظروف الناس ، لقيت بعض الناس تقول لي (ارفع الكشف يادكتور ! ، دا مش قيمتك خالص والناس مش هتيجي لك وتستقل بك !) ، بعدها بكذا سنة الكشف بقى ب (10) جنيه ! ، وكنت (أخصائي) فوجئت بالناس تقول لي (غلّيت الكشف ليه يادكتور ؟!) ، رغم أن كشف الممارس العام بنفس القيمة !
... مع الوقت تأكدت أن (عدم الرضا والقبول وحب النقد) ، ثقافة عند جميع البشر ، وذلك من تصريحات الناس ذاتهم :
... أن الناس تتفاخر أنهم ذهبوا للدكتور (فلان) في القاهرة بقيمة عالية جدا ! وكتب لهم روشتة بألف وألفين ! ، غير بقى إيجار السيارة ، غير الحجز بالشهر والإنتظار في العيادة حتى الفجر ! (ثقافة مجتمعية)
... تقلل الكشف ! تقل في نظر الناس ، ويقولوا مش فاهم وعايز الناس تيجي له !
... تزود الكشف يقولوا الجزار أهو ! ويدعوا علي الدكتور !
... تلبس عادي ! دا دكتور معفن !
... تلبس شيك ! دا إبن فلان بقى يتنطط علينا !
... تركب عربية معاهم ! يقولك ، إزاي مش عارف تجيب عربية يا دكتور ؟!
... تشتري عربية ! يقولك من فلوس ودم المرضى !
... لو رجعت كشف للمريض ! يقولك شكله شخصه غلط وخايف !
... مترجعش فلوس المريض الفقير ! يقولك دا بيجري ورا الفلوس !
... تكتب للمريض علاج رخيص ! يقولك شكله مش فاهم ، ولا متابع الجديد !
... تكتب له علاج غالي ! يقولك متفق مع الصيدلية !
... تكتب له تحاليل يقولك متفق مع المعامل !
... متكتبش تحاليل ! يقولك مش فاهم حاجة في شغله وإزاي يشخص من غير تحليل !
... يسألك عن دكتور في تخصص معين ! ترشده ! يقولك هياخد منه نسبة ومتفق معاه ويروح لغيره !
... تقعد معاهم وتهزر ! يقولك مش فاهم حاجة وعايز يعمل زبون ويقلل من قيمته !
... تكلمهم بكبرياء يقولك هو إبن مين يعني ؟! ، وهكذا !
... المصيبة أنهم بيمدحوا كتير الدكتور اللي بيكلمهم من فوق النظارة ! ويتعامل معاهم بشدة وعنف ! واللي كشفه غالي ! ويقولك دا (ضاكتور) كبير وفاهم ومعندوش وقت الله يعينه !
... طبعاً مش كل الناس بنفس الفكر ، لكن للأسف الأغلبية
... معادلات مستحيلة جدا ، كلها عشتها بنفسي ! ، ويعلم الله مدى حرصي على المريض ، لكن المعادلة مستحيلة !
... أصبحت أعمل اللي يرضي ربنا ! وأرمي كلام الناس خلف ظهري ! ، وبقيت أساعد الفقير لكن مرجعش له الكشف ، وتكون المساعدة بشكل تاني مثل إعطاؤه أدوية من التبرعات أو العينات ! ، بقيت أعمل الصح في شغلي ! واللي يقول يقول ، أصبحت أحافظ على الإستايل الخاص بي ! ، واللي عنده كلمة يطلعها براحته ! ، اللي يسألني عن تخصص تاني أقوله بأمانه ! ومش قصتي يصدق أو لأ ! والله المستعان ، معادلات مستحيلة ، لكن أعمل لله وأسعى لرضا الله يُرضي عني الناس (من أرضى الله بسخط الناس رضي الله عنه وأرضي عنه الناس)
... تحياتي ...
تعليقات
إرسال تعليق