وصايا سجين فلسطيني // بقلم سكينة حسن الشريف

 وصايا سجين فلسطيني

بقلم سكينة حسن الشريف 

.........

أجبلك إيه ياضنايا 

ليك وانا جايه معايا

 

* هاتيلي غطا وحبة دفا 

هاتيلي من سريركم 

مخدة و ملاية 

* هاتيلي حضن إخواتي 

وحشوني ومن أحلامي

 فارقوني

وملامحهم ضباب في عنيه .

* هاتيلي قعدة من أهلي 

وخلاني وصحبة صالحة

  مفرقاني 

* هاتيلي جواب من حد

مزروع في قلبه ما نساني .

* هاتيلي يمه

قطرة وبرشام صداع

بسببه عنيه وجعاني

* هاتيلي مٌسكن يطبطب

 على عظامي

ما هى نومة الأرض

 يماي جبتلي 

رطوبة و هداني

* هاتيلي قوة

 وشجاعة يقاسموني

برودة سجني وأسايا

# نفسي يمه في شمساية 

تدفيني وضليلة تحت شجرايا 

* وحشتني بنتي يمه 

وضحكتها ورقتها 

ومسكة إيدي فى إيدها  

وهيا جنبي ومعايا 

وحشتني الأصيلة

 خليلة النفس  

اللي تعبت أوى ويايا .

* كان نفسي أمسك

 لأختي فستانها

وأزين بالورود بيتها

وفي إيد عريسها أسلمها

وودعها ووصيها 

تصون دينها 

* إدعيلي وخلي

 أهلي يدعو لي 

أعود ليكم وترجع 

لمتنا من تاني .

٠٠٠٠٠٠٠٠٠٠٠٠٠٠٠٠٠

*هقلك حاجه يمه

  قبل ما تمشي 

حفظت كتاب الله 

 كله بآياته وأحكامه

 وفى قلبي و روحي انزرع 

وكنت عارف يمه 

أني هسعد قلبك

اللي عليا داب وانخلع..

٠٠٠٠٠٠٠٠٠

* نسيت يماي في

 زحام الاحتياج أبعت

سلامى للشمس والأحباب

وعرفيهم انهم فى قلبي وحشايا