أبويا لما مات // بقلم الشاعر والأديب سامح السبكي
ابويا لما مات
العمر ولى وفات والبيت بقى
ضلمة والحيطان اتيتمت
وكل شبر جوة بيتنا حزن عليه
والجروح ذادت علينا والقلوب أتألمت
الدموع زي السيول مع الاهات
راح اللي كنا بتنسند عليه
كل شيء كان حلو فات
ماكنتش تحلى اللمة الا بيه
راحت الفرحة والاحساس بالأمان
خلاص مات واللي كان كان
ونزلت الدمعة ومعدش فيا ثبات
والدنيا بقت حواليا
شريط بيدور حوالين الذكريات
ايام ما كنت لسة صغير ونازل اهات
كان دايما حنين عليا وشايلني بالساعات
مافيش يوم أسي عليا
الطيبة ويا الحنية
كان اب جميل مالوش مثيل
كنت اقعد اسمع حكاويه
عن ناس زمان واجدادنا
كلام يتغنى مواويل
كان نعم السند والضهر
وقت الشدة او في القهر
كنت تلاقي عيونه كما الجمر
خايف عليك من اي شر
نفسه يشوفك عايش حر
كان دايما على طول إنسان
قلبه كبير مليان احسان
طيب ومحسسنا بالأمان
من بعده تاه العنوان
والدمعة يا ناس بالمجان
سلام يا غالي
هاتوحشنا سنين وليالي
من بعدك يا خسارة على حالي
تاهت الضحكة في قلبي الخالي
صدقني العمر خلاص فات
.......
ابويا لما مات
.......
كلماتي...
الشاعر....
والأديب....
سامح السبكي
تعليقات
إرسال تعليق